Praktikánta Linn Kristin

 

Dál galgat mii praktikántat álgit blogget, in leat goassige ovdal dan dahkan, nu ahte dát lea oalle ođas munnje. Sáhtan álgit muitalit veaháš iežan birra vai dii beassabehtet veahá oahpásmuvvat munnje. Mun lean Linn Kristin Bær, lean 20 jagi boaris ja lean Kárášjogas eret. Liikun buoremus leat luonddus, nugo viehkat meahcis ja dálvet gis čuoigat. Geavahan hui olu áiggi iežan beatnagiidda, dikšut ja hárjehallat. Gilvvohalan sihke beanačájáhusas (beatnaga čábbodat árvvoštallojuvvo) ja agilitys (árroviehkan, beana galgá leat snáhpis ja jegolaš). Lean maid hui áŋgir govvidit ja redigeret, dan dihtii mun ohcen ge praktikánta virggi NRK Sápmái. De beasan oahppat ja geahččalit iešguđetlágan bargguiguin nugo rádion, journalistan jna. Lean lihkoš go mun lean okta dain gii lea ožžon praktikánta virggi. Mii leat njealjis, mun, Linn Margrete, Maria Therese ja Erica. Šaddet 6 gelbbolaš mánu singuin.

 

 

 

 

Vuosttaš beaivi

Vuosttaš beaivi praktikántan lei čearggus, ledje olu jurdagat mo visot bođii leat, geat dat eará praktikántat leat ja obanassiige mo vuosttaš beaivi šaddá.. Lei buorre dovdu go Biret Nystad (min šeaffa ja oahpaheaddji) lei váldimin vuostá resepšuvnnas, láidii ja čájehii midjiide min ođđa bargosaji. Lei somá go buot bargit válde min nu bures vuostá ja seammás adde maid buori ráđi. Čájehedje garra beroštumi ahte mii praktikántat galgat lihkostuvvat ja oažžut buoremus oahppu. Maŋŋá go leimmet beassan oaidnit olles NRK vistti ja mii guhtege bargi bargu lei, de oččuimet juohkehaš iežamet iPhone5. Beasaimet veahá áiggi geavahit čuoggut iežamet ođđa telefovnnaid ja hárjánit daidda ovdalgo vulggiimet geahččat go NRK filbmii Sámedikke kandidáhtaid, lei somá oaidnit go sii digaštalle. Ja lei duođai miellagiddevaš oaidnit mo filbmejeaddjit ja teknihkkárat gulahalle ja man bures doaimmai go juohkehaš dagai iežas oasi.
.
Ohppen olu vuosttaš beaivve, ja jus ná joatká, de gal šaddá dát praktikánta áigodat viehka hávski ja jahkan olu oahppat!

- Linn Kristin -

Linn M, Linn K, Maria T ja Erica